Британија гневна на САД поради оддавањето доверливи податоци за нападот во Манчестер

Британската министерка за внатрешни работи Амбер Руд ги критикувала САД бидејќи доверливи информации од истрагата за терористичкиот напад во Манчестер стигнале до јавноста, по вина на американски агенти, пишуваат светските медиуми.

Индепендент пишува дека поголем број на информации поврзани за нападите во Манчестер се појавиле на американските медиуми, односно во случајот телевизиите НБС и ЦБС, пред тие да бидат објавени од страна на британските официјални лица, како на пример податоци за бројот на жртвите, потоа информацијата дека се работи за бомбаш самоубиец, па дури и името на напаѓачот.

Амбер Руд изјавила дека овој инцидент е „иритирачки“ и јасно им ставила до знаење на американските колеги дека таквото протекување на информации не смее повеќе да се повтори, пренесува британски Индепендент.

Весникот потсетува дека најновата епизода со откривањето на тајните податоци се случува само недела дена откако беше откриено дека американскиот претседател Доналд Трамп на рускиот министер за надворешни работи Сергеј Лавров му открил доверливи податоци околу операциите против Исламска држава./крај/мф/бс