На вчерашната седница Владата на Република Македонија го разгледа и го усвои предлог-законот за амнестија и им препорача на Министерството за правда и на службите во владата да ги обезбедат условите за увид во предлог-текстот на законот до засегнатите министерства, како и до пошироката јавност.

Владата донесе одлука усвојувањето на законот да оди во редовна постапка.

Првиот драфт на предлог-законот ја опишува целисходноста од донесувањето на овој закон кој е времен и ќе се однесува на точно определени временски одредници. На денешната седница министерот за правда, Биљен Саљији, напомена дека предлогот за донесување  нов закон за амнестија е израз на добра волја на државата кон одредена група правосилно осудени лица, со цел нивна ресоцијализација и за растоварување на затворите од прекумерниот број лица кои се наоѓаат на отслужување на затворска казна воедно, како и заради условите во казнено-поправните установи во државата.

Според првичниот предлог-закон, ослободувањето од извршување на казна, односно амнестијата ќе ги опфати лицата осудени со правосилна пресуда на казна затвор за кривични дела пропишани со Кривичниот законик или други закони, кои до денот на влегувањето во сила на овој закон се на издржување на казната затвор, вклучувајќи ги и лицата кои на денот на влегувањето во сила на овој закон започнале со издржување на казната затвор во казнено-поправните установи во Република Македонија.

Предлог-законот за амнестија ќе се однесува и на лицата осудени со правосилна пресуда на казна затвор за кривични дела пропишани со кривични закони на друга држава, доколку сторителот е државјанин на Република Македонија и казната ја издржува во Република Македонија, врз основа на извршување на кривична пресуда на странски или меѓународен суд,

Со овој предлог, амнестијата ќе ги опфати осудените лица кои на денот на влегувањето во сила на овој закон не започнале со издржување на казната затвор, а имаат конечна и правосилна судска одлука за упатување на издржување на затворска казна во казнено-поправните установи.

Предлог-текстот на законот предвидува целосно да бидат ослободени од издржување на казната затвор и лицата осудени за дела кои на денот на влегувањето во сила на овој закон повеќе не претставуваат кривични дела.

Драфтот на законот за амнестија предлага осудените лица на кои им е изречена казна затвор до шест месеци потполно да бидат ослободени од издржувањето на казната. Сите други осудени лица за кои се предлага амнестија се ослободуваат од издржување на 30% од целокупната казна изречена со правосилна пресуда.

Министерот Саљији на вчерашната владина седница објасни дека со предложениот текст на закон не се предвидува амнестија за лица правосилно осудени на казна доживотен затвор, како и за сторители на кривично дело убиство од член 123 од Кривичниот законик, кој опфаќа убиства извршени на свиреп или подмолен начин, убиство при вршење  семејно насилство, убиства со умисла при што е доведен во опасност животот на уште некое лице, убиства од користољубие, заради извршување или прикривање на друго кривично дело, од безобѕирна одмазда или од други ниски побуди, убиства по порачка, убиства на женско лице за кое знае дека е бремено или малолетно лице и убиства на судија, јавен обвинител или адвокат при вршењето на неговата функција, односно дејност или службено или воено лице при вршењето на работите на јавната или државната безбедност или на должноста чување на јавниот ред, фаќање на сторител на кривично дело или чување на лице лишено од слобода. Овој член од Кривичниот законик се однесува и на лица осудени на затворска од најмалку десет години или со доживотен затвор за убиства со умисла на две или повеќе лица, за кои претходно не му било судено.

Амнестија не се предвидува и за сторителите на кривични дела против избори и гласање за кривични дела против половата слобода и половиот морал, за кривични дела против државата, за кривични дела злосторничко здружување , како и за кривичните дела против човечноста и меѓународното право.