Во чест на 13 Ноември, Денот на ослободувањето на Скопје, цвеќиња положи и делегација на Град Скопје, составена од градоначалникот на град Скопје, Петре Шилегов, претседателот на Советот на Град Скопје, Љубица Јанчева, и секретарот на Град Скопје, Викторија Аврамовска-Мадиќ.

– Денеска, кога го одбележуваме празникот на градот, се сеќаваме на храбрите партизани што го ослободија Скопје на 13 ноември 1944 година. Судбината сакаше и денеска да е понеделник како и тој ден. Се сеќаваме на борците од 12., 16. и од 3. бригада, кои од три страни се пробија во Скопје и со скромна опрема и обука успеаја да протераат далеку посупериорен противник. Тука треба да се издвојат пожртвуваноста и одлучноста на борците од 12. скопска ударна бригада, кои ги водеа најжестоките улични борби за железничката станица, Офицерскиот дом, Камениот мост, учителската школа и браната на Матка. На 13 ноември 1944 година беше важно да не се дозволи туѓи војски да учествуваат во ослободувањето на идниот главен град, но заради познавањето на градот и очекуваните улични борби беше важно скопјани да го понесат главниот товар со нивната новоформирана бригада. Овде со нас се некои од борците од 12. скопска ударна бригада и кон нив сакам да изразам посебен восхит и благодарност. Ви благодарам за жртвите што ги дадовме за слободата на нашиот град. Важно е да се спомене улогата на диверзантските групи составени главно од млади скоевци кои во Скопје дејствуваа зад непријателските линии и ги нарушуваа комуникациите на непријателот саботирајќи ги нивните телефонски жици, пруги, камиони… Токму овие луѓе го спасија симболот на градот – Камениот мост, од уништување, а нивниот спомен – Музејот на илегалната партизанска работилница за оружје, со години беше затворен поради негрижа. Набргу овој музеј повторно ќе биде отворен, а јас ќе се погрижам да биде што повидлив и попосетен. Ова е ден да се потсетиме дека војната по која беше ослободено Скопје беше истовремено и народноослободителна и антифашистичка. Токму ова второво беше заборавено минатава деценија и Скопје дозволи повторно да биде газено од луѓе со слични вредности како оние на соработниците на окупаторот во Втората светска војна. Градот што загуби илјадници свои сограѓани во логорите на смртта и којзнае уште колку други убиени, мачени и прогонувани во целата војна не смее да заборави на својата антифашистичка историја и на лекциите од минатото. Ние мора да се погрижиме фашизмот никогаш повеќе да не завладее со овој град – рече пред присутните градоначалникот Петре Шилегов.

Шилегов додаде дека е убава симболиката да се држи ова одбележување пред Споменикот на ослободителите подигнат во 1949 година, а направен од материјалот на стопените споменици на поранешните владетели на градот за да се потсетиме дека Скопје има историја на справување со симболите на своето темно минато.

Во името на борците ослободители на Скопје се обрати Трајко Стаматовски, претседателот на Градскиот одбор на борците на НОАВМ, кој потсети на пожртвуваноста на храбрите борци за ослободување на градот и истакна дека во борбите за ослободување на Скопје животот го положиле 398 борци, како и десетина граѓани.

Пред Споменикот на ослободителите на Скопје цвеќиња и венци денеска положија и: делегација на Градскиот одбор на Сојузот на борците од НОАВМ; делегација на Советот на Град Скопје; делегација од Кабинетот на претседателот на Република Македонија; делегација од Владата на Република Македонија; делегација од Собранието на РМ; делегација на АРМ; делегации од 12.; 3. и од 16. македонска народноослободителна ударна бригада; Секцијата на жените борци; делегации од oпштините на град Скопје, делегации на политичките партии, делегации од јавните претпријатија наГрад Скопје; делегации од јавните културни установи на Град Скопје; делегации на основните и средните училишта на Град Скопје, делегација на Црвниот крст на град Скопје и на Република Македонија; како и делегации на дипломатскиот кор и граѓани на Скопје.