Daily news
Кабинетот на Иванов: Лажна вест е дека Иванов не се ракувал со Шекеринска и Џафери за Денот на АРМ
Кабинетот на претседателот на РМ, Ѓорге Иванов, одговори на реакцијата на Министерството за одбрана на неговиот говор на прославата на Денот на Армијата.
„Лажна вест е дека претседателот на Република Македонија, д-р Ѓорге Иванов, не се ракувал со г-ѓа Радмила Шекеринска и со г. Талат Џафери на прославата. Зачудува, но не нè изненадува отсуството на реакција и демант од страна на Министерството за одбрана на ваквите лажни вести. Напротив, Кабинетот на Претседателот смета дека е недолично ваквото однесување на раководството на една сериозна институција како што е Министерството за одбрана, соопштија од кабинетот на претседателот Иванов.
„Претседателот Иванов останува на ставот да се почитуваат законите за оправдана употреба на Армијата во поддршка на полицијата при прогласена кризна состојба. Во изминатиот период, а по поплавите во скопскиот регион во август 2016 година, Иванов упати критика и побара одговорност од надлежните институции да ја остваруваат превенцијата, да си ги извршуваат задачите и во недостиг на време за завршување на постапката за законска оправданост да не ја доведуваат Армијата да интервенира трошејќи ресурси наменети за основната мисија“, велат од таму.
Како што велат од Кабинетот на Иванов, во изминатиот период речиси на секој значаен датум кога се прославуваат денови на Републиката, на Армијата и на Полицијата, Иванов ги има одликувано со ордени за заслуги и медал за храброст 90% од формациските единици во состав од АРМ и 3 униформирани полициски единици.
Во изминатиот период, но и до ден денес Министерството за одрана не обезбеди ревизија на законите за превентивна употреба и проширување на овластувањата на АРМ врзано за член 35 од Законот за управување со кризи, порамнување на платите на војниците со полициските службеници, доведувајќи ги во состојба на потчинетост, не обезбеди додаток за вонреден ангажман, не обезбеди основни услови за работа, опрема, транспорт, униформи и не го подобри престој во касарните нарушувајќи ја борбената готовност и логистичка поддршка, за што Генералштабот на Армијата редовно информира, велат од Кабинетот.
„Наместо да троши време во генерирање лажни вести, основна задача на Министерството за одбрана е да обезбеди поголем буџет, услови за редовна работа на АРМ и војниците кои се распоредени во кризните подрачја повеќе од 24 месеци. Претседателот Иванов се согласува со ставот на Министерството за одбрана дека во изминатиот период Армијата на Република Македонија извршуваше задачи на други институции и затоа бара таа пракса и противзаконското постапување да прекинат“, стои во соопштението од Кабинетот на Иванов.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Измамници се претставувале како Бред Пит и навеле обожавателки да веруваат дека почнале романтична врска со него
Во Шпанија уапсени се пет лица кои изнудиле 325.000 евра од две жени претставувајќи се како познатиот американски актер Бред Пит, соопшти денеска МВР на таа земја на својата официјална веб-страница.
Во текот на истрагата се покажа дека криминалците контактирале со своите жртви преку веб-страница за обожаватели на американскиот актер, ја добиле нивната доверба и ги навеле да веруваат дека почнале романтична врска со Бред Пит.
Потоа со лажно претставување ги натерале жртвите да инвестираат во комерцијални проекти.
Daily news
Спаси жена што сакаше да скокне од мост, а со години бесплатно ги хранеше бездомниците: Џон Бон Џови ја враќа вербата во човештвото
Познатиот рокер Џон Бон Џови пред десетина дена беше тема на сите светски медиуми кога убеди непозната жена да не скокне од мост. Овој потег не е единствениот што ја докажува неговата емпатија и хуманост кон луѓето што не ги познава.
Џон Бон Џови, американскиот музичар и фронтмен на познатиот бенд „Бон Џови“, на пешачкиот мост го снимал спотот за песната The People’s House кога од другата страна на оградата забележал жена.
На снимките од надзорните камери што ги сподели локалната полиција може да се види како Џон со член на својата екипа ѝ приоѓа на потресена жена. Потоа се потпрел на оградата и почнал да разговара со неа повикувајќи ја да се врати на безбедно по што ѝ помогнал да се прекачи преку оградата.
Бон Џови потоа ја прегрна и тие стоеја така околу една минута пред заедно да одат по мостот.
Полицискиот оддел Метрополитен во Нешвил го сподели видеото на нивниот канал на „Јутјуб“ и рече дека пејачот ѝ помогнал на очајна жена.
Секоја чест за Џон Бон Џови и неговиот тим што ѝ помогнаа на една жена на пешачкиот мост „Сејгенталер“ во вторникот вечерта.
„Бон Џови успеа да ја убеди да се симне од платформата на мостот на реката Камберленд на безбедно“, објави полицијата на платформата X.
Обожавателите на рокерот не беа изненадени од неговиот потег. Имено, тој во 2011 година основал непрофитна организација, односно синџир ресторани, каде што немало ценовници, а плаќањето на сметката било опционално.
Daily news
Награда за „Бизнисот на задоволството“ на фестивалот во САД, кој ги откри Спилберг и Џорџ Лукас
Долгометражниот филм „Бизнисот на задоволството“ на Гоце Цветaновски е добитник на наградата „Сребрено реми“ на „Хјустон интернешнал филм фестивал“ (WorldFest-Houston International Film Festival) во САД.
Овој значаен фестивал, кој постои цели 57 години е еден од најстарите во Америка и најстар во светот за независни филмови. Се гордее со тоа што во својата историја им ги доделил првите награди на легендарни режисери како што се Стивен Спилберг, Џорџ Лукас, Анг Ли, браќата Коен, Ридли Скот, Брајан де Палма, Оливер Стоун, Роберт Родригез, Спајк Ли, Дејвид Линч и уште многу други.
„Ова е голем успех. Да бидеш награден во конкуренција од над 4.000 филмови од 70 држави, е признание кое ја потврдува естетската вредност на филмот. Дефинитивно влеговме во убаво друштво, со оглед на тоа кој се’ е добитник на „Реми награда“ во историјата на фестивалот. И’ честитам на целата екипа којашто допринесе за меѓународниот успех на филмот и едвај чекам сите да се собереме повторно и во септември да го претставиме филмот пред македонската публика.“, рече режисерот Гоце Цветановски.
Наградата е деветта по ред на филмските фестивали во светот, а трета во САД, откако претходно „Бизнисот на задоволството“ го доби признанието за најдобар филм на „Риверсајд филм фестивал“ во Калифорнија и за највпечатлив филм во Седона, Аризона.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Снимен е со поддршка на Агенцијата за филм.