Daily news
Министерството пресече, операторите нема да им плаќаат на телевизиите за реемитување

По сомнежите дека ќе озакони рекет, Министерството за информатичко општество и администрација одлучи во финалната верзија на измените на Законот за аудио и аудовизуелни медиумски услуги да не ја вметне обврската операторите задолжително да ги реемитуваат домашните телевизии. Исклучок е јавниот радиодифузен сервис, за кој операторите и законски ќе добијат обврска да го реемитуваат бесплатно.
Претходната верзија на измените на Законот за аудиовизуелни услуги во членот 143 предвидуваше операторите да добијат обврска задолжително да ги реемитуваат програмските сервиси на домашните радиодифузери, но само за јавниот радиодифузен сервис беше прецизирано дека реемитувањето треба да биде бесплатно. Недореченоста во предложените измени на Законот, односно неутврдениот начин за реемитување на домашните радиодифузери, операторите и телевизиите го протолкуваа како отворена можност за озаконување рекет со кој ќе се обезбеди своевидна субвенција за дел од телевизиите и радијата додека на другите им се заканува клуч на врата.
Од Министерството за информатичко општество уверуваат дека финалната верзија ќе биде изменета.
„Утврдувањето на начините на кои ќе се реемитуваат медиумските содржини зависи од предлозите што ги добиваме од сите засегнати страни. Како што секогаш кажуваме, ние не инсистираме на ништо. Сè што е дел од овој предлог-закон е на предлог на релевантните страни во областа на медиумите. Во контекст на конкретното прашање, откако одржавме неколку работни состаноци и со согласност на сите заинтересирани страни, во финалната верзија на предлог-законот нема да постои обврска за реемитување, освен како и до сега за бесплатно реемитување на јавниот сервис“, изјави за „Макфакс“ Марија Теговска, советник за односи со јавност во Министерството за информатичко општество.

Во финалната верзија на предлог-законот нема да постои обврска за реемитување на домашните радиодифузери, освен како и до сега за бесплатно реемитување на јавниот сервис
Бидејќи се брише од предлог-измените обврската за реемитување на домашните телевизии, не постои ниту можност да се наметне обврска операторите да им плаќаат на телевизиите за реемитувањето. Односите, како и досега, ќе ги договараат сами телевизиите и операторите.
Од Министерството велат дека последната верзија на законот е на разгледување во Европската комисија и ОБСЕ и дека во секој момент очекуваат да им стигнат коментарите кои треба да ги разгледаат за законот да влезе во владина процедура. Од Министерството очекуваат тоа да се случи на следната седница на Влада.
„Во Брисел на разгледување е верзијата што ја имавме подготвено пред Нова година. Откако ќе ги добиеме сугестиите, ќе направиме измени со кои ќе ја повлечеме и обврската за реемитување на домашните радиодифузери. Отворено е и прашањето за процентот во кој ќе бiде застапена македонската музика на радијата. Со нив денес имаме состанок на кој очекуваме предлози и се надеваме дека ќе имаме заклучок со што предлог-измените на законот ќе бидат комплетни“, рече Теговска.
Од Делегација на ЕУ во Македонија велат дека сè уште немаат повратна информација од Брисел во врска со измените на законот ниту, пак, имаат најава кога ќе ги добијат.
Здружението на новинари на Македонија останува на ставот дека треба да се воведе давачка за операторите оти тие пренесуваат програма во која е вложен новинарски труд, кој ако не се вреднува соодветно нема да имаме слобода на изразување ниту, пак, слободни медиуми.
„Нашиот став е принципиелен, за да ги заштитиме новинарите, но ако операторите и телевизиите договорат друг начин, ние ќе го почитуваме“, вели Насер Селмани, претседател на Здружението на новинари на Македонија.
(М.И.П.)
СДСМ како ВМРО, ќе ги поткупува телевизиите со новиот закон за аудиовизуелни услуги
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Daily news
Бислимовски – Лорковски: Реформите во енергетиката мора да продолжат

Претседателот Марко Бислимовски, заедно со членовите и раководителите на секторите на Регулаторната комисија за енергетика, водни услуги и услуги за управување со комунален отпад (РКЕ) остварија средба со Артур Лорковски, директорот на Енергетската заедница.
Реформите во енергетиката мора да продолжат, континуитетот е клучен – фокусот да се задржи на активностите поврзани со интегрирање на пазарите за електрична енергија, нивна транспарентност и интегритет, како и неопходните реформи на пазарот со природен гас, што ќе обезбедат фер пристап за сите учесници, согласно новите европски мрежни правила – се сложија соговорниците.
Претседателот Бислимоски му се заблагодари на директорот Лорковски за позитивниот наратив за работата на РКЕ при презентацијата на Извештајот за имплементација на законодавството на Енергетската Заедница за 2024 година за државава во Собранието.
„Во очекување на новиот Закон за енергетика, РКЕ во соработка со Министерството за енергетика континуирано работи на подготовка за имплементација на новиот енергетски пакет. Интегрираниот пристап помеѓу сите чинители досега покажа дека е клучен за квалитетна и успешна регулатива, која ќе биде основа за развој на енергетските пазари . Капацитетите со кои располагаме, професионалниот тим кој се гради со години наназад и овој пат може да одговори на сите предизвици кои претстојат. “ изјава Марко Бислимоски, претседател на РКЕ
Лорковски посочи дека Енергетска Заедница ќе остане партнер во понатамошните процеси и дека стојат на располагање за поддршка во делот на креирање на подзаконските акти, откако ќе се донесе новиот закон за енергетика. Процесот на транспонирање на ЕУ правилата е клучно за да осигура работата на РКЕ за стратешките прашања поврзани со обезбедување на сигурна, стабилна и континуирана испорака на енергија.
Daily news
Измамници се претставувале како Бред Пит и навеле обожавателки да веруваат дека почнале романтична врска со него

Во Шпанија уапсени се пет лица кои изнудиле 325.000 евра од две жени претставувајќи се како познатиот американски актер Бред Пит, соопшти денеска МВР на таа земја на својата официјална веб-страница.
Во текот на истрагата се покажа дека криминалците контактирале со своите жртви преку веб-страница за обожаватели на американскиот актер, ја добиле нивната доверба и ги навеле да веруваат дека почнале романтична врска со Бред Пит.
Потоа со лажно претставување ги натерале жртвите да инвестираат во комерцијални проекти.
Daily news
Спаси жена што сакаше да скокне од мост, а со години бесплатно ги хранеше бездомниците: Џон Бон Џови ја враќа вербата во човештвото

Познатиот рокер Џон Бон Џови пред десетина дена беше тема на сите светски медиуми кога убеди непозната жена да не скокне од мост. Овој потег не е единствениот што ја докажува неговата емпатија и хуманост кон луѓето што не ги познава.
Џон Бон Џови, американскиот музичар и фронтмен на познатиот бенд „Бон Џови“, на пешачкиот мост го снимал спотот за песната The People’s House кога од другата страна на оградата забележал жена.
На снимките од надзорните камери што ги сподели локалната полиција може да се види како Џон со член на својата екипа ѝ приоѓа на потресена жена. Потоа се потпрел на оградата и почнал да разговара со неа повикувајќи ја да се врати на безбедно по што ѝ помогнал да се прекачи преку оградата.
Бон Џови потоа ја прегрна и тие стоеја така околу една минута пред заедно да одат по мостот.
Полицискиот оддел Метрополитен во Нешвил го сподели видеото на нивниот канал на „Јутјуб“ и рече дека пејачот ѝ помогнал на очајна жена.
Секоја чест за Џон Бон Џови и неговиот тим што ѝ помогнаа на една жена на пешачкиот мост „Сејгенталер“ во вторникот вечерта.
„Бон Џови успеа да ја убеди да се симне од платформата на мостот на реката Камберленд на безбедно“, објави полицијата на платформата X.
Обожавателите на рокерот не беа изненадени од неговиот потег. Имено, тој во 2011 година основал непрофитна организација, односно синџир ресторани, каде што немало ценовници, а плаќањето на сметката било опционално.