Daily news
ВМРО-ДПМНЕ обвинува за недостигот на вода во Куманово, СДСМ за Булачани
Драган Петковски од ВМРО-ДПМНЕ реагираше на недостигот од вода во Куманово кој според него трае веќе еден месец, порачувајќи дека е срамно по 27 години да нема стабилна структура за водоснабдување во овој град.
„Куманово веќе месец дена се соочува со недостиг на вода,а граѓаните мака мачат со нивните секојдневни обврски на овие тропски температури. По 48 часа од алармирањето, поедини делови на Куманово повторно се без капка вода, а другите делови од градот со значително намален притисок. Срамно е после 27 години да не се изгради стабилна водоснабдителна инфраструктура. Се уште пиеме вода од цевки кои се поставени речиси пред еден век и чија бактериолошката безбедност е под знак прашалник“, рече Петковски.
Според него, европското Куманово на градоначалникот е оставено со години да тоне без елементарни услови за живот, иако се смениле повеќе директори на јавните претпријатија. Зад нив, оцени тој, останале само превработеност и задолжувања, а ниту една инвестиција или проект кој би бил за доброто на градот.
„Се оди дури дотаму што за да се покријат настанатите долговите, се става под хипотека имотот на граѓаните“, тврдеше Петковски.
Според негова оценка, граѓаните не ја плаќаат најскапата вода во државава, туку сметката од нерационалното работење на градоначалникот Дамјановски и неговите директори на јавните претпријатија.
„Ситуацијата во населбите и во централното градско подрачје е иста. Секојдневно пукаат цевки, а граѓаните и фирмите не се во можност да ги извршуваат своите секојдневни обврски. Една од причините за недостигот на вода е и урбаната мафија на СДС и градоначалникот Дамјановски, односно непланското градење на згради, со дотраениот систем за водоснабдување кој очигледно не е предвиден за вакво дополнително оптоварување.
Без вода се оставени градинките, здравствените установи, пензионерските домови. Ико јавните претпријатијата се превработени, нема доволно кадри за да се испратат на терен и се чека подолго време за санирање на дефектите. Се случува граѓаните сами се вклучат во санирање заедно со службите кои едвај доаѓаат, само побрзо да се реши проблемот.Градоначалникот мора да понесе морална одговорност пред граѓаните и да се зафати со работа“, порача Петковски на прес конференција во Куманово.
Се наоѓаме во населеното место Булачани кое има повеќе од 400 домаќинства со околу 1200 жители.
Петковски не мораше да чека долго за одговор од СДСМ. Од оваа партија експресно одржаа прес конференција на која Борче Георгиевски изјави дека секое лето Булачани се соочува со големи проблеми во водоснабдувањето бидејќи еден од системите, со одлука на Општина Гази Баба од 2010 година, е предаден на управување и стопанисување на ЈКП Гази Баба.
„Вториот водоснабдителен систем, каде што се наоѓаме моментално, никогаш не е ставен во функција иако неколкупати беше ветувана изградба на нова секундарна мрежа, изградба на шахти и поставување на водомери. Токму поради нефункционалноста на вториот систем, во овој дел на Булачани, преку 200 домаќинства и преку 600 жители секое лето се соочуваат со недостиг на вода за пиење.
Поради намалениот доток во системот, старата и нефункционална водоводна мрежа, лошото менаџирање на Јавното комунално претпријатие и лажните ветувања на градоначалникот Тони Трајковски, жителите од овој дел на Булачани не можат нормално да функционираат“, порача Георгиевски, па во ист пародичен стил во однос на тој на ВМРО-ДПМНЕ додаде:
„Недозволиво е во 21-виот век, при тропски температури, над 600 жители да немаат навремено и квалитетно снабдување со чиста вода за пиење. Нехумано и нечовечки е на 600 граѓани да им биде ускратена основната животна потреба како што е водата.
Не постои никакво оправдување за неспособноста на Трајковски да обезбеди елементарни услови за секојдневно функционирање на жителите на Булачани. Затоа, и Булачани и општина Гази Баба, имаат итна потреба од промени. Веќе наесен, граѓаните на Гази Баба ќе добијат одговорен градоначалник и Совет на општината. Новата локална власт предводена од СДСМ ќе работи во интерес на граѓаните и општината, а прв приоритет ќе биде обезбедување на квалитетни услови за живот и навремено водоснабдување за сите рурални средини во општината“, возвратија од СДСМ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.