Македонија
(Видео) Лазаревски: Го напуштив работното место во МВР за да ги заштитам бомбите
Јас го напуштив моето работно место за да ги заштитам бомбите, таа одлука не беше само моја. Постоеше некаква опасност да бидат загрозени бомбите и затоа го напуштив работното место, вели Ѓорѓи Лазаревски, еден од свиркачите кој ги изнесе нелегално прислушуваните материјали од УБК, во интервју за „Макфакс“.
„Во меѓувреме никогаш не дојде до иницијатива да се вратам на тоа работно место, не знам зошто е тоа заборавено, тоа беше главната причина за напуштањето на работното место, тие што така одлучиле си знаат најдобро. Јас имам ангажман што неодамна го најдов, тоа е договор на дело на една година и задоволен сум од работата, пристојна е, работам во добар колектив. Не сум пријавен, социјалното го покривам преку семејна фирма“, вели Лазаревски.
Лазаревски и Ѕвонко Костовски, кои се ексвработени во УБК и свиркачи на бомбите, од Македонија се номинирани за наградата „Новинари, укажувачи и чувари на правото на информирање“, која ќе биде доделена на 29 мај во Европскиот парламент. Ова е втора номинација за двајцата свиркачи што ги изнесоа нелегално прислушуваните материјали од УБК по претходно веќе добиената меѓународна награда за слобода на говорот.
Лазаревски вели дека се гордее што е во ова друштво на луѓе номинирани за значајна меѓународна награда. Истовремено, потенцира дека, за жал, во земјата сè уште не постои соодветна заштита и третман на свиркачите.
„Немам никаков третман, јас сум обичен граѓанин како и секој друг во оваа земја. Ниту некоја институција се занимава со мене, со тие што ми се пријатели ќе разменам по некој збор, но не гледам дека постои каков било концепт за некое мое ангажирање или употребување на моето искуство или каков било гест со кој би ми укажале институциите дека и јас сум дел од ова. Едноставно, јас сум осамен граѓанин како и повеќето граѓани што гледаат да си го исполнат денот, да заработат нешто и да се грижат за семејството“, вели Лазаревски.
Тој за време на прес-конференцијата по повод номинацијата за наградата истакна дека смета оти постои центар на моќ кој е против неговото враќање на работа во МВР.
Целото интервју со Лазаревски може да се гледа во видеото.
Кристина Озимец
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
ВМРО-ДПМНЕ: Над 180.000 гласови предност се обврска за ВМРО-ДПМНЕ Македонија повторно да ја врати на народот
180.000 гласа разлика во корист на Силјановска Давкова и ВМРО-ДПМНЕ пред Пендаровски и СДС е порака дека народот сака промени и крај на понижувањата, соопштија од ВМРО-ДПМНЕ.
„Народот не поддржува политика на понижување на Македонија. Граѓаните јасно кажаа дека се против криминалот на СДС и ДУИ. 7 години Македонија тоне на секое поле. На почеток на секоја учебна година немаше учебници за учениците, за болните немаше лекарства, за земјоделците немаше откуп. Народот не се чувствуваше безбеден, криминалот царуваше по улиците“, велат од ВМРО-ДПМНЕ.
Како што истакнуваат, народот не сака да живее повеќе во несигурност.
„Над 180.000 гласови предност се обврска за ВМРО-ДПМНЕ Македонија повторно да ја врати на народот. Победата во вториот круг ќе биде уште поголема, а СДС и Пендаровски, заедно со нивните газди од ДУИ никогаш повеќе нема да бидат во позиција да го понижуваат народот. Македонија повторно твоја“, завршуваат од ВМРО-ДПМНЕ.
Македонија
ЦУК: Коловозите во државата на многу места се влажни и имало ситни одрони на сите патни правци
Во Центарот за управување со кризи, имало вкупно 1 694 повици на единствениот повикувачки број за итни случаи 112.
Од нив „реални“ повици биле 49,82 отсто, а 50,18 отсто биле за други потреби на граѓаните што не биле итни. Кон полиција биле упатени 69,92 отсто и кон итната медицинска помош 28,91 отсто од реалните повици кон 112 во ЦУК.
Во последното деноноќие немало евидентирани пожари на отворено.
Од ЦУК потсетуваат дека коловозите во државата на многу места се влажни и имало ситни одрони на сите патни правци во последното деноноќие.
Екипите ги отстранувале одроните на патот и нема прекин на сообраќајот.
Сервисни информации
Преку денот сончево со мала до умерена облачност, утрото претежно ведро и наместа постудено
Времето денеска со претежно ведро и наместа постудено утро. Преку денот ќе биде сончево со мала до умерена облачност. Попладне во планинските региони ќе има услови за краткотраен локален дожд. Ќе дува слаб до умерен ветер претежно од западен правец. Минималната температура ќе биде во интервал од -1 до 7, а максималната ќе достигне од 16 до 23 степени.
Во Скопје ќе биде сончево со мала до умерена облачност и со слаб ветер од северозападен правец. Минималната температура ќе се спушти до 3, а максималната ќе достигне до 21 степен.
Во сабота попладне ќе има услови за локална нестабилност со краткотраен пороен дожд и грмежи. Потоа следува период на стабилно и топло време.