Германија очекува Иванов да дозволи што поскоро формирање на влада

Германија се грижи за иднина на Македонија и ја потврдува својата обврска за да ја поддржи земјата на патот кон НАТО и ЕУ, во корелација со претходните изјави на еврокомесарот Јоханес Хан и високата претставничка на ЕУ за надворешна и безбедносна политика Федерика Могерини, изјави во четвртокот специјалниот претставник за Југоисточна Европа, Турција и државите на ЕФТА во рамките на министерството за надворешни работи на Германија, Кристијан Хелбах кој е во посета на Македонија.

„За ова да биде можно, потребно е брзо формирање на влада која ќе биде посветена на Итните реформски приоритети. Процесот на реформи е во средиштето, на луѓето им се потребни работни места, социјална заштита, владеење на правото и ефективни мерки против корупцијата. Ги повикуваме сите актери да се воздржат од предизвикување на раздор и на прашања кои не се поврзани со овие приоритети“, реле Хелбах

„Веруваме дека претседателот ќе ги почитува резултатите од изборите и ќе дозволи мнозинството во Парламентот што поскоро да формира влада. Парламентот мора да биде способен да продолжи со својата работа за да може да одлучи по итните прашања кои се од јасен интерес за земјата“, додаде тој.

Хелбах порача дека Германија очекува „сите страни да се однесуваат одговорно за да може да избегнат потенцијални тензии“. „Со загриженост ја нотираме негативната реторика кон невладините организации и меѓународната заедница и ги повикуваме сите страни да се воздржат од таков јазик“, рече тој.

„За крај, би сакал да потенцирам дека од огромна важност е Специјалното јавно обвинителство да продолжи со својата работа, согласно со независна и кредибилна поддршка од судството во земјата. Како вистински пријател, Германија се надева дека политичката криза може да биде надмината, за што е потребна конструктивна политичка волја на сите учесници во процесот“, додаде германскиот претставник, кој за време на посетата на Македонија оствари средби со претседателот Ѓорге Иванов, шефот на дипломатијата Никола Попоски и лидерите на партиите кои се застапени во Собранието./крај/мф/бс