Скопје
Андоновска: Арсовска да објасни зошто итна седница за ЈСП за кое истураме пари, а пак нема автобуси, ако не знае да работи, да си даде оставка
Денеска, за седницата на Советот на Град Скопје гледам дошле сите колеги советници, од сите советнички групи, но ја нема таа што ја побара оваа седница, а тоа е Арсовска, да ни објасни зошто оваа седница мора да се случи токму сега, рече Марија Андоновска, советник во Советот на Град Скопје од редовите на ВМРО-ДПМНЕ.
Андоновска посочи дека за советниците да гласаат итност, градоначалничката Данела Арсовска треба да образложи зошто ја бара оваа итна седница и токму со оваа точка.
„Таа не е тука со месеци, како мисли да раководи со овој Град, без да дојде тука да се соочи со советниците, кои треба да ги поддржат или не точките што таа ги предлага и кои таа треба да ги реализира. Со оглед на фактот дека се работи за точка за ЈСП, да потсетам дека овој Совет со месеци бара информации за ЈСП за тешкотиите со кои се соочува ЈСП“, рече Андоновска.
Посочи дека во Советот се носат одлуки, меѓу кои и онакви со кои се издвојуваат финансиски средства.
„Тие пари не се наши лични, не се ни на Арсовска, тие се на граѓаните и треба да ни објасни и нам и на граѓаните зошто тоа претпријатие има тешкотии токму откога таа е градоначалник, зошто му се даваат најмногу средства, а има најмногу долгови. Должна е Арсовска да објасни ако сака ова претпријатие да работи и граѓаните да добијат соодветен јавен превоз. А што се случува – нема автобуси, доцнат, претпријатието има долгови, а се бара ние да истураме средства, а не знаеме каде завршиле претходните“, рече Андоновска.
Праша дали се работи за незнаење или за криминал.
„Затоа таа треба да е тука и да ни објасни и да се најде решение, ако не знае како да се справи со ова претпријатие, со Градот, нека си поднесе оставка. Нека не го малтретира Скопје, скопјани не се должни да живеат во вакво Скопје“, заклучи Андоновска, која побара да се обезбеди присуство на Арсовска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
Герасимовски: Мотивиран кадар во градинките дава резултати
Општина Центар и оваа година додели 12 награди и пофалници за најдобрите воспитувачки, негувателки, соработници и помошно-технички персонал од детските градинки.
,,Професионалниот, посветен и мотивиран кадар е од голема важност во процесот на воспитувањето, негата, квалитетното згрижување и образување на нашите најмали.
Раното детство е клучно за севкупниот развој на личноста. Затоа е од витална важност персоналот што работи во предучилишните установи да биде на ниво на задачата, а децата да се развиваат, растат и учат во средина што е стимулативна и безбедна. Само така ќе им обезбедиме успешен старт во животот.
Како Општина ќе продолжиме да ве поттикнуваме и мотивираме во таа благородна мисија“, истакна градоначалникот на Општина Центар Горан Герасимовски, честитајќи им на вработените за добиените награди.
Наградите во износ од 30.000,00 денари се доделени, согласно општинската Програма за здравствена, социјална заштита и заштита на децата, а врз основа на претходно утврдените критериуми за вреднување на работата на вработените во детските градинки во Општина Центар.
Настанот се одржа во матичниот објект на ЈУДГ „13 Ноември“, а беше организирана и детска ликовна изложба, при што за најдобрите трудови беа доделени пофалници.
Општина Центар секоја година доделува парични награди и благодарници за вработените во градинките што се истакнале во својата дејност, со цел дополнително да ги мотивираме сите оние што директно или индиректно придонесуваат во работата со деца, соопштија од оваа општина.
Скопје
Дел од неколку скопски општини без струја
Регионалниот центар за управување со кризи на Град Скопје, по добиеното известување од ЕВН, ги известува граѓаните дека поради технички зафати во електро дистрибутивната мрежа без електрична енергија ќе останат:
· од 08:00 – 14:00 часот, корисниците од дел од с. Студеничани. (Општина Студеничани)
· од 09:00 – 14:00 часот, корисниците од дел од улиците: Ринхини и Езерци во нас. Влае. (Општина Карпош)
· од 10:00 – 12:00 часот, корисниците од ул. Пелистерска бр. 2, во нас. Карпош 3. (Општина Карпош)
· од 13:00 – 14:30 часот, корисниците од дел од ул. Миле Поп Јорданов, (објектите во околината на Градинката Пролет). (Општина Карпош)
Скопје
Реконструирана училишната спортска сала во основното училиште „Мирче Ацев“
Општина Ѓорче Петров финишира со реконструирањето на училишната сала во основното училиште „Мирче Ацев“, која е веќе пуштена во употреба.
При реконструкцијата изведен е менување на подот во салата, каде што беше поставен нов гумиран под, бојадисување, молерисување на ходникот и кабинетот на наставникот по физичко образование, целосно нова вентилација и опремување со нови спортски реквизити, извести Општина Ѓорче Петров.
Овој проект беше неопходен за нормално одвивање на часовите по физичко образование на основците. Со неговото завршување направен е чекор плус во создавањето добри услови за настава во една од шесте образовни институции во Ѓорче Петров.
Проектот е реализиран во соработка со Министерството за образование и наука, се додава во соопштението на Општина Ѓорче Петров.