Македонија
Зекири: Кога-тогаш Законот за јазици ќе биде донесен, во тек се усогласувањата на ставовите меѓу партиите
Потпретседателот на СДСМ и пратеник во Собранието, Мухамед Зекири вели дека порано или подоцна Законот за јазици ќе биде донесен. Тој не знае кога ќе биде свикана седницата за разгледување на законот, но вели дека до тогаш ќе има дополнителни координации со цел усогласување на ставовите меѓу партиите во Законодавниот дом.
„Носењето на Законот за јазици е обврска која мора да се исполни. Ние го гласавме два пати законот, тој е согласно уставот. Уставниот суд треба да пресече доколку тој не е регуларен. Дали законот ќе биде изгласан на наредната седница, останува да видиме. Порано или подоцна, Законот ќе биде донесен“, вели Зекири за „Макфакс“.
Во однос на прашањето дали СДСМ и коалицијата би дозволила повторно блокирање на Собранието поради Законот за јазици, Зекири вели дека тие немат таква желба.
„ВМРО-ДПМНЕ е партија која тврди дека ги поддржува законите кои треба да не однесат во Европската унија, ако е така, треба да учествува во работата и во пракса да го покаже тоа. Тие како политичка партија сами ги носат одлуките за тоа дали ќе се придржуваат до тоа што кажуваат“, додава Зекири.
Изминатата недела, седницата на која требаше да се разгледуваат амандманите за Законот за јазици беше два пати одложена, а потоа откажана. Собранискиот спикер на партиите им даде рок од една недела да ги усогласат ставовите, а неофицијално се очекува најдоцна до четврток да биде одржана седницата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Сиљановска Давкова по повод Денот на сесловенските просветители светите браќа Кирил и Методиј: Тие се наш патоказ за иднината
Претседателката Гордана Сиљановска Давкова упати честитка по повод 24 Мај, Денот на сесловенските просветители светите браќа Кирил и Методиј.
„Од сè срце ви посакувам празникот да го поминете во добро здравје, љубов и хармонија, исполнети со радост и со среќа што имаме можност да ги ползуваме плодовите на великото дело на солунските браќа. Благодарение на нив, словенските народи добија можност да ја развиваат својата духовност, култура, образование, наука. И македонската јазична и културна самобитност, но и светогледот и космополитизмот се втемелени од нивната работа и достигнувања, и од нивното човекољубие.
Светите Кирил и Методиј покажаа дека со знаење, жед за вистината, правдољубивост, посветеност, хуманизам и благородност, можат да се надминат ограничувањата и да се победат неправдите. Историјата на Европа и на светот нема премногу примери на така влијателни личности коишто имаат оставено печат на своето време, но и патоказ за иднината и кои се светилници на човечката цивилизација. Затоа нивното дело и по еден цел милениум не бледнее и не губи на значење.
Нека подвигот на светите браќа и понатаму бидe наш патоказ и морална и духовна вертикала за достоинствено и исполнето живеење, творење и создавање“, напиша Сиљановска Давкова.
Македонија
Одбележување на Денот на сесловенските просветители Свети Кирил и Методиј
Со повеќе настани денеска во земјава се одбележува Денот на сесловенските просветители светите браќа Кирил и Методиј, кои се основоположници на словенската писменост и литература и се заслужни за културниот развој на сите словенски народи.
Поради нивните заслуги за христијанството Светата црква ги прогласила за рамни на апостолите.
Државно-црковната делегација предводена од претседателката Гордана Сиљановска-Давкова престојува во Рим и во Ватикан каде што ќе се поклони на гробот на Свети Кирил, во рамки на манифестацијата „Ден на светите Кирил и Методиј“, а имаше и аудиенција кај папата Франциск.
Во согласност со Законот за празниците во земјава, 24 Мај – Денот на сесловенските просветители светите браќа Кирил и Методиј е државен празник и неработен ден за сите граѓани.
Македонија
Сончево и топло време, попладне појава на краткотраен пороен дожд и грмежи
Сончево и топло со мала до умерена облачност. Ќе дува слаб до умерен ветер претежно од северозападен правец. Попладне ќе има изолирана појава на нестабилност со краткотраен пороен дожд и грмежи. Минималната температура ќе биде во интервал од 7 до 14, а максималната ќе достигне од 21 до 29 степени.
Во Скопје сончево и топло со мала до умерена облачност и со умерен ветер од северозападен правец. Минималната температура ќе се спушти до 10, а максималната ќе достигне до 27 степени.
Во деновите од викендот ќе преовладува променливо облачно време, наместа нестабилно со пороен дожд, грмежи и локална појава на невреме. Во понеделник се очекува преодно стабилизирање на времето, а од вторник во попладневните часови повторно ќе има изолирана појава на пороен дожд и грмежи.