Македонија
„Протестирам“ протестираше против задолжувањето
Како и изминатите денови, и во вторникот вечерта приврзаниците на таканаречената „Шарената револуција“ се собраа пред Специјалното јавно обвинителство (СЈО), каде што традицонално веќе му ја изразуваат поддршката на обвинителството за предмети произлезени од незаконски прислушуваните разговори, а овојпат под мотото „Трошиме пари на чоколадо, а ние немаме ни за леб!“, нивна „цел“ на бојадисување беше Управата за јавни приходи (УЈП).
„Првиот чекор мора да биде транспарентноста во трошењето на народните пари, парите на граѓаните. Трошењето на парите од буџетот не смее повеќе да остане скриено. Секој граѓанин од својот компјутер мора да биде контролор и да има увид до последниот денар како се трошат парите од страна на институциите, бидејќи тоа се пари од граѓаните кои се дадени од разни даноци и давачки“, рече меѓу другото Драган Тевдовски, член на опозицискиот СДСМ, која ги поддржува овие граѓански протести.
Истакна дека е императив трошењето на јавните средства да биде транспарентно, зашто, како што предупреди, долговите граѓаните ги плаќаат од својот џеб.
Од импровизираната говорница пред зградата на УЈП беше повторено дека долгот на земјата во времето на актуелната власт се зголемил за 2,5 милијарди евра. Или, како што прецизираа, Владата се задолжува 15 евра секоја секунда, 52 илјади евра секој час, еден милион и 250 илјади евра секој ден.
„Оваа Влада го задолжи секое домаќинство во Македонија за 4.455 евра, и секој од нас за 1.240 евра. Овие бројки одовде само ќе растат! Со секој нивен ден на власт, ние сме сè посиромашни и позадолжени!“, порачаа во најавата на вторничната манифестација од „Протестирам“.
Во вторникот вечерта протесни поворки на ова граѓанско здружение се одржаа и во други градови низ земјата, како Велес, Делчево…, или според организаторите во вкупно 14 градови./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Херојот кој беше убиен во Вејце – Бобан Трајковски, доби споменик
Со почит кон споменот на бранителот Бобан Трајковски, на 28 април, во центарот на Куманово, во 12 часот, ќе биде откриен мурал со неговиот лик, во пресрет на 23-годишнината од неговата херојска смрт.
Бобан Трајковски, припадник на Баталјонот за специјални намени „Волци“ на Армијата на Република Македонија на 28 години го положи својот живот на олтарот на татковината против терористите од ОНА во 2001 година кај Вејце.
Муралот е изработен од талентираните уметници Младен Трендевски – Трендо, Горан и Дејвид (сограѓани на Бобан).
Организатори на настанот се Здружението СИЛА и колегите од специјалната единица ВОЛЦИ.
Скопје
Муцунски: Аеродром го заслужува најдоброто, започнува реализацијата на голем капитален проект
Градоначалникот на Општина Аеродром, заедно со претседателот на советот, Дејан Митески и директорката на основното училиште „Блаже Конески“ утрово на работен состанок ја утврдија динамиката по која до крајот на оваа школска година треба да започне реконструкцијата и доградбата на основното училиште „Блаже Конески“.
„Станува збор за важен инфраструктурен проект, онаков каков што заслужуваат граѓаните на Аеродром. По неговото финализирање, Аеродром ќе добие модерно и современо училиште, направено согласно сите европски стандарди, училиште кое ќе биде пример за квалитетна градба, одржливост и енергетска ефикасност“, истакна градоначалникот Муцунски во својата објавата на Фејсбук.
Тој додаде дека најважно од се е што реконструкцијата и доградбата нема да го наруши нормалното функционирање на училишните активности, а нивната организација ќе биде направена во консултација и согласно барањата на родителите, со кои утрово Муцунски одржа состанок.
Македонија
(Видео) Ковачки: Со над 800 милиони евра владата од ВМРО-ДПМНЕ ќе ги решава проблемите на земјоделците
„Благодарност за поканата на нашиот градоначалник Виктор Паунов, тука сме заедно и со кандидатот за пратеник Гордана Барбашка. Како што нашиот градоначалник работи и покрај опструкциите од централната власт, гледате дека се развива и се гради. Во иднина ние планираме да дадеме 250 милиони евра за сите општини во Република Македонија без разлика кој е на власт. Само во Карбинци ќе доделиме 1,8 милиони евра за сообраќајна и комунална инфраструктура, значи дополнително општините ќе се градат и дополнително ќе се развиваат“, рече Драган Ковачки, член на ИК на ВМРО-ДПМНЕ и носител на Изборна единица 3.
„Како што работи нашиот градоначалник во Карбинци, така ќе работиме и ние на централно ниво. Дополнително за жителите од овој крај предвидуваме над 800 милиони евра во 4 годишен мандат за земјоделците што значи реконструкција на сите водоводни канали, да го решиме проблемот со водоснабдувањето, да го решиме проблемот со загарантираниот откуп, и да го решиме проблемот со загарантираната цена. Значи ќе отвораме и нови откупни центри.
Земјоделците од овој крај заслужуваат внимание, заслужуваат да си ја работат земјата тие, а не земјата да ја поседуваат феудалци како Љупчо Николовски и сличните на него.
Македонија е одлучна за промени, Македонија сака да биде горда, и Македонија заслужува да биде повторно твоја.
Затоа ги повикувам сите граѓани на 8 мај масовно да ни се приклучат да излеземе заеднички, да ставиме крај на овие црнила и овие сивила кои ги донесоа СДС и ДУИ“, изјави Драган Ковачки, член на ИК на ВМРО-ДПМНЕ и носител на Изборна единица 3.