Регион
Успешен референдум во Република Српска
Во Република Српска, во неделата, се одржа референдум, прв во дејтонската Босна и Херцеговина, на кој граѓаните одлучија во иднина 9.јануари да се обележува како Ден на РС.
На референдумот во Република Српска од запишаните 1.219.399 граѓани, на гласачките места излегле помеѓу 59 и 60 отсто од гласачите, од кои 99,79 отсто се изјасниле 9.јануари во иднина да се обележува како Ден на РС.
Гласањето минало без инциденти, во мирна атмосфера, а претседателот на РС, Милорад Додик, порачал дека референдумот ќе влезе во историјата на РС и Босна и Херцеговина.
Додик рекол дека референдумот е законско право кое го има Република Српска, истакнувајќи дека „српскиот народ покажал зрелост и политичка решителност.
Премиерката на РС, Жељка Цвијановиќ, изјавила дека сите оние кои нема да можат да се идентификуваат со 9.јануари како со денот на Републиката, нема да имаат обврска да го прославуваат.
Додека во РС се одвиваше референдумското гласање, во останатиот дел од Босна и Херцеговина, медиумите известуваа дека се работи за неуставен референдум, кој нема ништо да смени во државата.
Претседателот на претседателството на Босна и Херцеговина и претседател на партијата СДА, Бакир Изетбеговиќ, оценил дека референдумот е „ескалација на самоволието на претседателот на РС Милорад Додик“.
Референдумот мина во напната атмосфера на релација Сараево-Бања Лука, бидејќи Уставниот суд на БиХ, кого раководството на РС не го признава, го прогласи референдумот за неуставен.
Од потпишувањето на Дејтонскиот мировен договор кој означи крај на војната во БиХ, ниту едно прашање не ги крена тензиите како што тоа го направи одлуката на Бања Лука да го организира референдумот.
Светските агенции пренесоа дека во РС е одржан референдум, за спорен национален празник, а агенциите Ројтерс и АФП, констатираа дека мнозинството граѓани се изјасниле во иднина 9.јануари да се прославува како Ден на РС, дополнувајќи дека овој празник е спорен за останатите ентитети во БиХ, бидејќи е датумот е поврзан со војната која се водеше во 90-тите години од минатиот век.
Исто така агенциите потенцираат дека референдумот е прв на територијата на БиХ по оној во 1992 година кога граѓаните гласа за отцепување од Југославија по што следуваше крваа тригодишна војна.
Ројтерс потсетува дека на 9.јануари 1992 година босанските Срби прогласија независност од Босна и Херцеговина наведувајќи дека „со тој чин се забрзаа воените дејствија, во крвавата војна која однесе најмалку 100.000 човечки животи“.
Британската агенција пренесе дека Европската унија и САД не го подржаа референдумот, поради стравот дека тој може да ја дестабилизира земјата, додека Русија го поддржа референдумот. крај/мф/нц
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Лекари во Загреб вградиле мозочен стимулатор на маж со Паркинсонова болест : „Може да вози велосипед, да плива“
Уште еден голем успех на хрватските лекари. Тим хирурзи во болницата Дубрава прв во овој дел од Европа вгради мозочен стимулатор. Пред еден месец новата технологија ја примил загрепчанец кој поради Паркинсоновата болест речиси станал неподвижен.
„Поентата на таа електрода е што стимулира дел од мозокот и на тој начин ја подобруваме клиничката слика, а батеријата освен што стимулира, купува и информации од тој дел од мозокот што го стимулираме и на тој начин можеме да ги подобриме симптомите“, изјави неврохирургот Фади Алмахарик за RTL.
Во КБ Дубрава изминативе 24 години се врши длабока мозочна стимулација, но првиот пациент беше опериран со оваа најнова технологија на крајот на март. Станува збор за 67-годишен загрепчанец со Паркинсонова болест, кој сега е пуштен на домашно закрепнување.
„Во договор со неврологот, стимулацијата се вклучува, терапијата се намалува, пациентот веднаш по вклучувањето на стимулацијата покажува знаци на моторно подобрување. Беше отпуштен дома на физикална терапија и дополнително прилагодување на стимулацијата“, изјави неврохирургот Марина Рагуж.
Веднаш штом ги отстранивме шевовите по 10 дена, почнавме со стимулација и денес пациентот може да вози велосипед, да плива, да се врати на своето секојдневие“, вели хирургот.
Регион
Додик не го признава геноцидот во Сребреница: „Ќе однесеме цвеќе, ако не навредува никого“
Во четвртокот, лидерот на Србија во Босна и Херцеговина, Милорад Додик, изрази подготвеност да го посети Меморијалниот центар Поточари во Сребреница и да положи цвеќе на заедничкиот споменик подигнат во спомен на масакрот на Бошњаците за време на војната, но тој повторно негираше дека таму имало геноцид.
Во интервју за новинската агенција на Република Српска, претседателот Додик најави дека владата и целото раководство на овој ентитет ќе заседаваат во Сребреница на 2 мај 2024 година, кога ќе се одржи дискусија пред Обединетите нации и се очекува гласање за Резолуција за осуда на геноцидот во тој град во летото 1995 година.
Резолуцијата е поддржана од дваесет земји, меѓу кои САД, Обединетото Кралство и Германија и се очекува нејзино усвојување. Целта е да се интернационализираат страдањата на Бошњаците во Сребреница.
Водечките српски претставници од Белград и Бања Лука, претседателите Александар Вучиќ и Милорад Додик, тврдат дека ова е обид да се префрли вината на српскиот народ.
„Република Српска нема да ја прифати резолуцијата за Сребреница за која ќе се одлучува во Генералното собрание на ОН бидејќи се што е напишано во неа е лага. Босна и Херцеговина не може да живее врз основа на тоа дека едната нација во неа е оквалификувана како геноцидна“, рече Додик.
Сепак, тој изрази подготвеност да им оддаде почит на жртвите од масакрот во Сребреница.
„Ако ни се укаже можност, на 2 мај ќе однесеме венци во Поточари, ако тоа не навреди никого. Не се плашам дека би можел да завршам како Вучиќ, кој дојде да им оддаде почит на жртвите, изрази сочувство, а доби камен во главата и никој не одговараше за тоа“, истакна Додик.
Тој смета дека Резолуцијата за Сребреница сепак нема да го добие потребното мнозинство на седницата на Генералното собрание на ОН.
Регион
Двајцата осомничени за убиството на малата Данка испратени во Специјалната затворска болница
Двајцата осомничени Срѓан Јанковиќ и Дејан Драгијевиќ денеска се испратени во Специјалната затворска болница во Белград на психијатриско вештачење, пишува „Телеграф“.
Во написот медиумот пишува дека осомничениот Дејан Драгијевиќ (50) деталите за убиството на детето ги изнесе во Вишото јавно обвинителство во Заечар. Сепак, тој не сакаше да открие каде го оставил телото на Данка.
Срѓан Јанковиќ (50) не зборувал за делото.
Во Вишото јавно обвинителство во Заечар биле сослушани и родителите на Данка, Ивана и Милош, кои, како што се наведува, опишале како течел денот кога исчезнала ќерка им.
Додека давале исказ, во иста просторија седеле и осомничените за убиството на детето.
Пред рочиштето исказ за „Телеграф“ дал таткото на убиената Данка.
„Смртната казна не им е доволна, треба да бидат во затвор до крајот на животот. Тоа се чудовишта, она што постојано го доживуваме не се опишува. Тоа може да го разбере само родител. Неколкупати ни дојде полиција, ѝ зедоа разни работи на Данка, ништо не знаеме, ниту за крвта на патот ниту во автомоблилот, ништо. Не ни е јасно зошто не се јавиле во итната помош, зошто не помогнале, но го направиле ова што го направиле. Тоа што јас и Ивана постојано страдаме е страшно, разни луѓе ни се јавуваат, нѐ навредуваат, ни ја префрлаат вината. Морав да побарам да го сменам бројот, не можеме повеќе. Кога сѐ ќе заврши, ќе кажеме сѐ“, рече тој.