Претседателот на ВМРО-ДПМНЕ, Христијан Мицкоски, денеска на митинг се обрати пред граѓаните во општина Кратово. Мицкоски пред присутните истакна дека е дојдено време политичките измамници од врхушката на СДСМ, на чело со Зоран Заев, да заминат во политичка пензија.

„Ќе дојде денот кога од прв до последен ќе одговараат, се обидоа да го лажат народот дека немале време за интонирање на македонската химна, да не му биде незгодно на новиот пријател на Зоран Заев во неговата земја, оној Зоран Заев кој нè убедуваше дека го зајакнал идентитетот. Истиот што се срамеше да одговори на кој јазик зборуваат жителите на северна Грција, се срамеше да каже дека тоа се Македонци што зборуваат македонски јазик, пеат македонски песни и играат македонски ора“, потенцира Мицкоски.

Мицкоски во своето обраќање одговори на повиците за АРМ на портпаролот на СДСМ со професорката Гордана Силјановска-Давкова истакнувајќи дека тоа младо момче не знае што е утринска смотра, што е пожарство, дали знае што е стража на минус 20 степени во половина метар снег, а не знае ниту неговиот лидер Зоран Заев бидејќи со лажна медицинска белешка го избегнал воениот рок, но, како што рече, затоа не им пречеше да ја обесчестат армијата, да ја постројат македонската гарда и да ја интонираат македонската химна.

„Ветуваа правда, ветуваа мир, а направија пекол затоа што по две години, секој граѓанин на Република Македонија денеска знае дека, всушност, ниту правда било во прашање, ниту мир, ниту живот, туку пусти пари биле во прашање. Но, затоа ние денеска треба оваа неправда да ја победиме со правдата што ќе ја донесе идната претседателка, а тоа е професорката Гордана Силјановска-Давкова“, нагласи Мицкоски.

Тој потенцира дека крајот е блиску затоа што изборот е едноставен.

„Од една страна, го имаме Стево Пендаровски, поддржан од сите политичари од транзицијата, кои урнаа илјадници човечки судбини, а од друга, ја имаме професорката Гордана Силјановска-Давкова, бескомпромисен борец, кој секогаш е на страната на правото, правдината, Уставот и законите.
Гордана Силјановска-Давкова со својот личен, домашен, но и меѓународен интегритет и професионален идентитет и тимот на врвни експерти, има јасен план како да се вратат правото и правната држава“, потенцира Мицкоски.

Мицкоски на крајот уште еднаш ги повика жителите на општина Кратово да ја поддржат професорката Силјановска-Давкова на 21 април и на 5 мај затоа што голема победа на овие избори ќе ја отвори вратата за предвремени парламентарни избори, на кои Зоран Заев и СДСМ ќе заминат во политичката историја и ќе изгрее зората на слободата, која ќе донесе правда во Македонија.

Кандидатот за претседател Стево Пендаровски на средбите со жителите на Дојран и Богданци ги повика граѓаните в недела, 21 април, со својот глас за бројот 3 да одлучат за сигурна иднина и да изберат напредок за европска држава.

Со гласот за Гордана Силјановска може да се вратиме само назад, во времето груевизмот, и да се продолжат штетните политики на Иванов, додаде тој.

„Ајде да излеземе масовно на гласање в недела и да избереме напредок. Заедно да победиме, заедно да одиме напред. Да го исполниме заветот на борците пред чиј споменик стоиме и кои ни дадоа аманет – ние се втемеливме, вие градете. Во изминатите речиси две години сите сме сведоци на еден целосно нов пристап во односите со соседите, кој ги решава најтешките проблемите и ги отвора портите на Северна Македонија кон напредок, сигурна иднина и светот“, рече кандидатот за претседател, Стево Пендаровски.

Пендаровски побара максимална мобилизација на изборите бидејќи,како што рече, станува збор за патот по кој треба да продолжи земјата, па секој глас е важен.

Кандидатот за претседател Гордана Силјановска-Давкова вечерва им се обрати на граѓаните во Кратово, каде што рече дека добила поддршка од претседателот на Европската народна партија, што, според неа, претставува силен ветер во грбот.

„Она што сакам денеска да го споменам е поддршката однадвор, која многу ни значи, како што знаете, претседателот на Европската народна партија, господинот Дол, застанува зад нас, тоа го вети во Брисел. Пред него тоа го стори и господинот Курц, навистина е тоа европски силен ветар во нашите едра, реформски, во нашите опозициска едра, во нашите изборни едра, она што доаѓа на 21 април и на 5 мај“, вели таа.

Силјановска-Давкова додаде дека со Владата на СДСМ и Заев граѓаните живеат сè посиромашно. Таа рече дека никој не сака да ги слушне проблемите на граѓаните истакнувајќи дека доколку победи на претседателските избори, ќе биде првата амбасадорка на сиромашните откажувајќи се од средствата само за нив.

Според неа, заевизмот не е филозофија, туку методологија на авторитаризам и дека граѓаните ќе стават крај на таквото владеење бидејќи, како што рече таа, народот се умот, свеста и мудроста на Македонија. Силјановска додаде дека она што го ветила пред граѓаните ќе го исполни, а не како сегашните политичари на СДСМ, кои не знаат што точно ветуваат и кога се негираат дека ветиле нешто.

„Ние тоа што го кажуваме го помниме, во срцето го носиме и го докажуваме. Тие го забораваат, тие постојано го негираат, па не знаат што ветиле, што сториле, а што негирале, тоа е нивниот кошмар, ние сме нивниот кошмар“, додаде Силјановска.

Според неа, оваа Влада нема ниту желба ниту знаење за да направи вистински реформи потенцирајќи дека непотизмот, криминалот и корупцијата се вистинска одлика на СДСМ и Заев.

„Тие немаат смисла, ниту желба ниту знаење, целосно се политички импотентни за препознавање на потребата на квалификувана стручна посветена на граѓаните, државната и јавната администрација. Се фалеа дека ќе се борат со непотизмот, ама непотизмот е нивна политичка филозофија, нема министер што не вработил некого од семејството и не се загрижени за тоа. Да не говорам за корупцијата и криминалот, тие стимулирајќи ги и толерирајќи ги корупцијата и криминалот, го рушат суверенитетот на Македонија, ја прават Македонија слаба држава, ја прават Македонија пропадната држава. Процесот на одлучување, наместо во силни и стабилни институции, го лоцираат меѓу двојки, тројки, четворки во неформални структури на неформален начин, во неформални структури одлучуваат за најважните национални прашања. Јас тоа ниту го поддржувам ниту ќе го практикувам“, нагласи Силјановска.

На крајот, Силјановска побара поддршка од граѓаните и масовен одѕив како на 21 април така и на 5 мај сè со цел да може да ја реализира програмата со која настапува на овие претседателски избори и да се врати владеењето на правото, а со тоа, конечно, Република Македонија да оди напред на вистинскиот пат, а тоа е Европската Унија.